Decembarip ulluisa 21-anni ullukinnersiortarpugut – ulloq taarnerpaaffik, tassanilu qaarmarngup arriitsunnguamik uteriartuaarnissaa malunnartittarlutigu. Nunatsinni Inuit kinguaariinni ullormut tassunnga atatillugu immikkut ileqqoqarput, tassani neriunneq, nutaanngulerneq ataatsimoornerlu ataqatigiillutik.
Inuit ileqqui
Ataatsimoornerup nukittorsarneqarnissaa anguniarlugu ullukinneq inunnut ilaqutariinnik katersuuffiuvoq. Oqaluttuaqattaanneq, erinarsorneq, qilaatersorneq pinguarnerlu ullorsiornermi pingaaruteqarlutik. Taarsiornerup nalaani ileqqut taakku kissalaarnermik nuannaarnermillu pilersitsisarput, inuiaqatigiinnilu ataqatigiissuseq nukittorsarneqartarluni.
Ileqqut ilaanni seqerngup uternissaa qulakkeerniarlugu periuseqartoqartarpoq. Pinngortitap tunissutaanut qujamasunnermik takutitsisoqartarpoq, ukiullu pitsaasuunissaa qaamasuunissaalu neriuutigineqartarluni. Inuit ilaat ukiup taarnerpaaffissaani nutaanik atisartaartortarput.
Ullutsinni ullukinneq
Ullumikkut decembarip 21-at –Ullukinneq – siulitsinnit pingaartinneqangaarluni malunnartinneqartarpoq, sulilu qaammarngup qanorluunniit uteqqinnissaanik eqqaasittarluta.
Ullukinneq pinngortitap nikinneranik nalliussineriinnaanani aamma nutaanngulernermut takussutissaavoq. Inuunitsinni unammillernartunut taartoq eqqaanartuuvoq, seqerngullu uternera neriunnermik nutaanngulernermillu takutitsisuulluni. Taarsiornerpaaffimmi qaammarngup uteriartuaarnerani qaammaqqittuaannartoq eqqaasinneqartarpugut.
Naak ileqqoq nalitsinni juullimit qaangerneqariartuaaraluartoq, suli kalaalerpassuit ilaqutariittut katerisimaarlutik pinngortitaminngaaneersunik nerilluataajutigalutik nalliussisarpaat. Ulloq kalaallit piorsarsimassusaanut pingaaruteqartorujussuummat, ukiuni kinguIlerni ullup sulinngiffiunissaa oqallisigineqallattaasalerpoq. Ulloq Kalaallit Nunaanni piorsarsimassutsikkut illorsuarni katersugaasivinnilu nalliuttorsiutigineqartarpoq.
Aassuutit: Qaarmarngup Paarsisua
Siulitta qanga seqineq kaperlammit ajugaaffigineqartarsimanera qilammiillu kiviartuaartarnera upperisimagaat oqaluttuarineqartarpoq. Naggataagullu seqerngup tammavinnissaa qaqugumorsuarmullu taarsiornissaq annilaangagineqartarluni. Ajornartorsiutaalluinnartorli tamanna Aassuutiniit piviusunngortinneqanngitsoortarpoq – tassaasut ulloriaaqqat marluk, Altair aamma Tarazed.
Aassuutit seqineq amoqqittarpaat, tassanngaanniillu kiviartoraangat paarisarlugu. Aassuutit seqerngup qullariartornerani inunnut neriunnermik qaamanermillu oqariartortarput – taartup tiguaaqqajunnaarneranik qaammarngullu uterneranik ersiut.
Qaamaneq qanoq ilisarpa?
Ullukinneq ukiup ulluini naannerpaavoq, unnullu takinerpaalluni. Seqineq qilammi appasinnerpaaffissaminiittarpoq, piffissamilu tassani Qaasuitsup killeqarfiata avannaatungaani nuineq ajorluni. Qanga inuit ulluinnaannut pinngortitap qanoq issusaa attuumassuteqarluarallarmat, tamanna pisartoq assut isumaqarsimaqaaq. Seqineqanngiffik unamminartorsiorfiusinnaavoq, aammali tarrarsorfiusinnaallunilu ataatsimoorfiusinnaavoq.
Ullukinnerup kingorna seqineq arriitsunnguamik nuiartoqqilissaaq. Qaamaneq neriunnermik isumalluarnermillu nassataqarluni ullormiit ullormut annertusiartuaartarpoq. Tamanna inuunerup kaajallanneranik nalliuttorsiorfiusoq ullullu qaamanerulernissaannik qilanaarfiulluni saqiffiusarpoq.
Ullukinnermi tamanut inuulluaqqussut
Nunatsinniittut nunarsuarmiullu tamaasa Ullukinnersiorluarnissaannik kissaappagut! Qaamaneq ilinnut ilaquttannullu kialaamik, neriunnermik nutaanngulernermillu tunisigilitoq. Siulivut, ataatsimoortarnivut ileqqugullu kinguaariinni kissumissiussisuvut nalliuttorsiutigitigit.
Ullukinnerup qaammarngup utilernera ersersittarpaa – ilutigalugulu periarfissanik nutaanik nutaamillu aallartinnermik nassataqartarluni.
Ullukinnersiorluarisi!
Explore the map
Kl 
En
Da
