Aasivissuit – Nipisanut tikeraarit
Tikeraat ataqqinnittut
Aasivissuit – Nipisat iluani immikkoortumut tikeraarninni pinngortitamik nunamilu eqqaassutissat siammarsimasunut eqqummaarinninnissannik qinnuivigissavatsigit. Eqqagassaatitit nassartuaannakkit eqqaavissatullu inissinneqarsimasunut igillugit, taamaaliornikkut pinngortitaq mingutsinneqassanngilaq uumasullu atortussanik ulorianaateqartunik nerisaqassanngillat.
Assiliisoq Dorthea Reimer-Johansen
Eqqaassutissat
Eqqaassutissat assigiinngissitaarlutik isikkoqarsinnaapput, nalinginnaanerpaalli tassaapput inussuit, ilivitoqqat, tupeqarfiit, issunik sanaartukkat, talut qimatuliviillu. Takornariartuuguit, eqqaassutissamik naammattoorsiguit 2 meterimik ungasissuseqassaatit, 20 meterinillu ungasitsigalugu tupertornak imaluunniit ikumatsitsinak. Eqqaassutissat nakkutigineratigut kinguaassatsinnut qanganitsanik attatiinnartitseqataassaatit, qajassuussinernullu qutsavigingaarpatsigit.
- Nunami inussunnik akornusiissanngilatit nutaanilluunniit sanassanngilatit. Najugaqavissunut aqqutissamik takussutissaapput aammalu siusinnerusukkut najuisunit aqqutissiuisuullutik – taamaattumillu pingaarutilerujussuullutillu tammartajaannginnissamut iluaqutaasuullutik.
Ilivitoqaq: Toqusunik matoorilluni ujaqqanik amitsukujuunngorlugu sanaaq. Nalinginnaasumik toqunikup iluarusuutigisassaanut isikkivigittumut inissinneqartarpoq.
Tupeqarfiit: Ujaqqat arsatut angitigisut ammaloriusanngorlugit inissititikkat, toqqit sinaakkutaasa tunngatsiffigisartagaanik takutitsisuusut. (Assip tunorlerpaani takuneqarsinnaavoq).
Toqqit: Ini nigallip affaatut ilusilerlugu issunik pukkitsumik iigalik amitsukujuumillu sisamanik teqeqqulimmik isaarialik. (Assip saarlerpaani takuneqarsinnaavoq).
Issunik sanaaq: Issuinnarmik illuliat illup iigai ujaqqanik saattukujuunik issunillu quleriissaarilluni sanaartugaavoq.
Illut sisamanik teqeqquliusinnaapput imaluunniit ammaloqiusaallutik, tassani kulturi sorlermi sanaajunersut apeqqutaaginnarluni, eqqaanilu qaqortuaraq meqqulualinnik ataatsimoortunik takunninnissamut iluatsitsisoqarsinnaavoq, taakkumi attaqarneranik takussutissiisarput.
Piffissap ingerlanerani ujaqqat oqimaassusaasa issut naqiqqaneratigut iikkat nakkaakkiartulertarput.
Talut: Ujaqqat qaleriissaarlugit nigaliup affaatut ilusilikkat. Pallorluni piniakkanit takuneqarsinnaajunnaarluni toqqortoqartarpoq.
Qimatulivik: Nerisassanik nillataartitsiviulluni ujaqqanik qaleriissaakkanik sanaaq. Issunik aamma sanaajusinnaavoq. Nalinginnaasumik qammamut pioreersumut inissinneqartarpoq.
Explore the map
Kl 
En
Da
