@Miki Jacobsen
Qeqqata Kommuniani kommunalbestyrelsi juunip naanerani ileqquusumik Kangerlussuarmi ataatsimiippoq. Pilersaarutip ilaattut kommunalbestyrelsi Aavitsup Tasiata eqqaanut nunarsuarmiunut kingornussassap Aasivissuit – Nipisat killeqarfianiittumut nasiffimmut alakkaavoq. Sumiiffiup kulturikkut pinngortitallu kingornussaasup immikkuullarissusai ersersinniarlugit illersorniarlugillu Aasivissuit – Nipisanni Qeqqata Kommunianit nasiffik suliniutigineqartunut ilaavoq.
Kommunalbestyrelsi issiavissaarsuarmi silagissiorpoq Aasivissuillu – Nipisat pillugit allagartaliami paasissutissat atuarneqarsinnaallutik. Issiavissaarsuaq allagartallu Sisimiuniit illussanik titartaasartumit Frydenrejnimit ilusilersugaapput nunarsuarmiunullu kingornussassiap isumaqassusaa oqaluttuassartaalu pillugu alakkarterisunut paasissutissiisarpoq.
Nasiffimmut alakkarterereernerup kingorna Kangerlussuup Katersugaasiviani ammaanersiortoqarnerani kommunalbestyrelsimi ilaasortat najuukkiartorput. Saqqummersitsinermi annerusumik Aasivissuit – Nipisat sammineqarput. Pingasunngorneq, ulloq 26. juuni 2024-mi ammaanersiornermi katersugaasiviup aqutsisua Dorthe Katrine Olsen, kommunalbestyrelsi sinnerlugu Kuka Thomassen Hoffmann aamma UNESCO Aasivissuit – Nipisat sinnerlugit Laust Løgstrup oqalugiartuullutik ammaanersiortitsipput.
Katersugaasivimmi aqutsisup qujassuteqarluni oqalugiarnermini peqataasut saqqummersitsinerup piviusunngortinnissaannut sunniuteqartut kiisalu aningaasaateqarfiit aningaasatigut tapiissuteqartuusut ilanngullugit taakkartorpai. Aningaasaateqarfiit tassaapput: Aningaasaateqarfik Augustinus, Aage V. Jensenip Aningaasaateqarfii, Aningaasaateqarfik 15. juni Fonden aamma Kalaallit Nunaanni tips og lotto-t kiisalu Qeqqata Kommunia. Tamatuma kingorna nunaqarfimmi aqutsisuni ilaasortat Johan Langep aamma Kuka Thomassen Hoffmannip alakkarterisunut nuannaarutaaqisumik saqqummersitsineq tamanut ammarpaat.
Ammaanersiornermi eqqumiitsuliortup Miki Jacobsenip eqqumiitsuliani katersugaasivimmi maanna kusanaqutaaqisoq ilisaritillugu saqqummiuppaa. Qalipakkami ukiup kaajallannera piniariuseq siulitta ukiuni tusindilikkuutaani issittumi uumaniarnerminni malitarisimasaat takuneqarsinnaapput.
Ulloq Kangerlussuarmiut Qilaatersornermut peqatigiiffiannit kulturikkut takutitsinerannik naggaserneqarpoq, meeqqat inuusuttullu qilaatersorput alakkarterisut nuannaarutigeqisaannik.
Explore the map
Kl 
En
Da
