main slider overlay

Park ranger koorpuua?


Qanga filmini allaakaatittarsimasaanni koorpulersaarutini ilaasa eqqaamassajunnarsivaat Texas rangereqartarmat. Inuit Aasivissut – Nipisani park rangereqarnera tusaraangamikku aamma ilaasa taakkununnga assersuussisinnaasarput. Immaqami ilaatigut aamma ilumoortortaqalaarsinnaavoq, tamarmimmi nunaannarsuarmi sulisarput. Kisianni Nunarsuarmioqatigiit Kingornussassaqarfianni Park rangeri sulerisartoruna? Park rangeri ulluinnarni taaguutigitinneqartoq kalaallisuunngorlugu taaneqartarpoq nunatani nakkutilliisoq.

Christian Pihlblad Jerimiassen Aasivissuit – Nipisani ukiuni kingullerni marlunni Park rangeritut sulivoq. Ulluinnarminilu nunatami sermersuarmiit sinerissami imaq tikillugu angitigisumi, nunat assigiinngitsut akornanni arsaattarfiit akuerisaatut angissusilinni  582.000 missaani angissusilittut assersuunneqarsinnaasumi aqqusaartagarpassui assigiinngittaqaat.

Ataani assimi nammineq oqartarneratuut ´allaffimmini´ isikkivini ilorrisimaarutigerujoorpaa.

Park ranger, Eqalugaarniarfimmi angalaarnermini.

– Ullut ilaani imminut pussuttariaqartarpunga eqqaasinniarlungalusooq ilumut sulillunga, Park ranger Christian Pihlblad Jeremiassen oqarpoq.

Park rangeritut Christiaap Aasivissuit – Nipisani nuna aamma kulturikkut pisuussutigut tigussaasut paarisussaavai. Taamaasiortarporlu ileqqoreqqusat malillugit ATV-nik pisullunilu angalaartarnermigut, atuisunik siunnersuisarnemigut paasissussutissiisarnemigullu. Ineriartuutillu assigiinngitsut alaatsinaannerisigut qisuariarfigisarnerisigullu.

Sapaatit akunneranut arlaleriarluni Christiaat nunamut nakkutilliiartortarpoq. Pingaartumik piniarfinngoraanga piniarnermut nakkutilliisut malittarisassat malillugit ingerlasoqarnersoq ikiortaasarpoq.

– Ilaatigut nunami ileqqoreqqusanik unioqqutitsissilluni ATV-nik ingerlaarfiusimasut naammattoortarpagut, taakkulu pisulluta malittarisarpagut assilillugillu unioqqutitsisoqarsimanera uppernarsartarlugu. Aammali ilaatigut piniarfigeqqusaanngitsumi piniartoqarsimasoq naammattoortarparput taakkulu aamma nalunaarusiortarpagut, Christian oqaluttuarpoq.

Park rangerip suliassaata ilagaat nunami suliassat suusinnaasulluunniit suliarinissaat. Ilaatigut ilisimatuut ilisimatusarneranni ikiortaasarpoq aammalu nunaannarsuarmi ilisarnaqqutissat ikkussornissaat suliarisarpai.

Kingornutassiaqarfimmi ilisarnaqutissap ikkussornerani Christian qillerilluni ulapittoq. Kangerlussuarmiit ingerlaarneq, ilisarnaqutissap ikkussornera utimullu angerlarneq ulloq naallugu suliffiuvoq.

Park rangerip immamiit sermersuaq tikillugu sulinermi ATV atorlugu imaluunniit pisulluni nakkutilliineq aamma nalunaarusiortarneq kisiat suliassarinngilaa. Suliassaasa pingaaruteqarluinnartut ilagaat meeqqat inuusuttullu peqataatinnissaat. Taamaattumillu Junior Park rangereqalernissaanut aamma sulissuteqarpoq. Taamaasillunimi meeqqat inuusuttut siunissamilu atuisussat Kingornutassiaqarfik Aasivissuit – Nipisat pillugu paasinninnerulersinnaapput, tamannalu anguneqarsinnaappat aamma piginnittussatut kulturimillu ataqqinninnerunissaq pilersinneqassaaq. Taamaasillutillu meeqqat inuusuttullu nunatatta paarilluarneqarnissaata pingaaruteqassusaa aamma ilisimasaqarfigilluarlersimassavaat.

Meeqqat talut qanoq atorneqartarnesut misilittaasut. Saniani takuneqarsinnaavoq “Anngannguujunnguup” qajaa.

Christian, site manager Paninnguaq Fleischer-Lyberth ilagalugu meeqqanut pinnguartarfimmik ujaqqqat atorlugit qajaliorlutik, tupeqarfiliorlutik, killuliorlutik qimatuliviliorlutillu naammassiortuleruttorlutik meeqqat saneqquttut aperipallapput ”Anngannguujunnguumuna pinnguartarfia?”.

Kalaallit Nunaanni kulturit assigiinngitsut tamangajammik ersiutaat Aasivissuit – Nipisani nassaassaapput. Tamakkulu kulturikkut eriagisassat Park rangerip alaatsinaattussaavai. Kisianni aamma ilaanni angalasarnerpassuamini nutaanik nassaariataarsinnaasarpoq.  Uani ataani takusinnaavarsi Christiaap talut nassaarisimasani qanga qanoq atorneqartarsimaneri takutikkai.

Park ranger Christian p. Jerimiassen ilaatigut Sermersuarmut angalanermini talumik nalunaarsorneqarsimanngitsumik nassaarpoq.

Uani ataani Christiaat malittarisassat, maleruagassat inatsisillu pillugit paasiniaarsuataartoq takuneqarsinnaavoq. Piniagassat suut qaqugukkut piniaagaasarneranik ilisimassanik katersivoq.

Sidebar

Instagramimi malinnaaffigitigut

#aasivissuitnipisat   #naturebeing

We are on Instagram
🇬🇧
New homepage www.inuitheritage.gl

🇬🇱
Nittartagaq nutaaq www.inuitheritage.gl 

#naturebeing #destinationarcticcircle #aasivissuitnipisat
This error message is only visible to WordPress admins
Error: Access Token is not valid or has expired. Feed will not update.

Explore the map