Aasivissuit – Nipisat pillugit saqqummersitsineq ataqqinartunit alakkarterneqartoq

@ Kongehuset

Kalaallit Nunaanni kulturikkut kingornussarpassuit torrallataavissut nersorinniffigissallugit Kunngi Frederik aamma Dronning Mary marluliaatitik prinsesse Ivalo aamma prins Minik Sisimiut katersugaasiviannut pulaaqqammerput. Pulaarnermi UNESCO-p Nunarsuarmiut kingornussassaqarfianniittoq Aasivissuit-Nipisat uumasoqarfiusutut oqaluttuassarpassuaqartutullu ilisimaneqarluartoq ukkatarineqarpoq.

Kialaartumik tikilluaqqusineq

Pulaartoqarneq katersugaasivimmi aqutsisup Dorthe Katrine Olsenimit kialaartumik tikilluaqqusineranik aallartinneqarpoq kingornalu site manager Paninnguaq Fleischer-Lyberth Aasivissuit-Nipisat pingaarnertut ilisaritinneqarnerat pillugu oqaaseqarpoq saqqummiillunilu. Site managerip nunatap oqaluttuarisaanikkut pingaaruteqassusaa uumasoqassusaalu pillugit nassuiaavoq, nassuiaaneralu prinsesse Ivalomit aamma prins Minimmit soqutigineqarluarpoq. Marlulissat nunataani uumasoqarneq oqaluttuassartaalu pillugit uummaarissumik apersoqattaarput, taamaakkamik alapernaannertik kajumissuseqarnertillu takutippaat.

Ilisarititsinerup kingorna qinnuteqarnermi atuagaq Aasivissuit-Nipisat UNESCO-p Nunarsuarmiut kingornussassaannut ilanngunneqarnissamut atorneqartoq Kunngimut Dronningimullu qitornaannullu tunniunneqarpoq.

Arfanniat atisaat, tupeq qajarlu uppinnaveersaarfik

Tamatuma kingorna ilaqutariit illup iluani silamilu saqqummersitat takutinniarlugit katersugaasivimmi aqutsisup Dorthe Katrine Olsenip angalaaruppai. Ilaqutariit piffissaqarluarlutik katersugaasivimmi immikkoortut assigiinngitsut qimerluualaarpaat, pingaartumik illup iluani saqqummersitat arfanniarnerup nalaani takussutissiaq arfanniallu atisaannik assiliaq ilaqutariiusuni oqaloqatigiissutigineqarluarput, tuttulli ilusaattut ilillugit saqqummersitat meeqqanit nuannerineqarnerpaajorpasipput.

Aasivissuarnit tupeq silami pissusiatut napparneqarsimasoq soqutigilluarpaat, taamaattumik Kunngi, nulia qitornaalu, Naalakkersuisunut Siulittaasoq Múte B. Egede aamma borgmesteri Malik Berthelsen mersortartoq Dina Fontain peqatigalugu tupermut iserput minutserpaalunnilu tupermiillutik. Meeqqattaaq illumi issuinnarmi uppinnaveersaarfik atorlugu qaannamik sungiusarnertik nuannarilluarpaat, taakkulu kunngikkut ilaqutariit qungujunnaralugit, quianaralugillu assiliisaqattaarutigaat.

Tupermiit qimmeqarfimmut

Katersugaasivimmeereernerup kingorna ilaqutariit sumiiffimmut ungasinngitsumut qimmeqarfiliaanneqarput, tassanilu qimusseq Nunatsinnilu qimussip pingaaruteqassusaa pillugit oqaluttuunneqarlutik. Sisimiuniittaaq Kangerlussuarmut ATV-nut aqqusineq immikkoortup ilaani assigiinngitsuni aqqusineqarnerata pingaaruteqassusaa Aasivissuit-Nipisatigut aqquteqartortaaq pillugu paasisaqarput.

Sisimiut Katersugaasiviani pulaarneq aamma Aasivissuit-Nipisat pillugit saqqummersitap takuniarneri Kunngi Frederimmut, Dronning Marymut marluliaataannullu Nunatta kulturikkut kingornussaanik UNESCO-llu Nunarsuarmiut kingornussassaqarfiannik immikkuullarissuusoq itinerusumik paasisaqarfigaat. Ulloq ilinniarfiulluartoq, misigisaqarfiulluartoq kalaallillu oqaluttuarisaanerannut pinngortitaannullu nutaatut attaveqalertutullusooq ippoq.